رد على قصيدة بنفس الوزن والقافية، مجاراة شعرية

البارحة يوم الخلايق نياما

بيّحت من كثر البكا كل مكنون

قمت اتوجد له وأنثر علاما

من موق عيني دمعها قبل مخزون

ولي ونةٍ من سمعها ما يناما

ونّت صويبٍ بين الأضلاع مطعون

وإلا كما ونّه كسير السلاما

خلوه ربعه للمعادين مديون

ولا في ونة راعبية حماما

غاد ذكرها والقوانيص يرمون

الله من قلب غدا فيه تفريق

يتلي ضعون مبعدين المناحي

قسم بتغريب وقسم بتشريق

والقسم الآخر ما ادري وين راحي

لي صاحب ما فتق البيت بي ويق

ولا عذبه طرد الهوى والطماحي

والله يا لولا افاهق الصبر تفهيق

وارجي عسى دربه يجيلي سماحي

أبوي يا حامي عقاب المشافيق

اطير الذلان ضرب الملاحي

نومك طرب وانا بنومي هواجيس

ماساهرك باليل كثر الهمومي

اسهر ليا نامت عيون الهداريس

وباليل اراعي ساهرات النجومي

اشوف عدلات الليالي مقابيس

ولا احد من الدنيا عظامه سلومي

تضحك وتخفي لك خفي الهناديس

تفطر لها يوم ويوم تصومي

اعمل وتلقا وافهم العلم بالقيس

دنياك لو زانت تراها نقومي

دنياك هذي كلها هَزِّ قاروق

ما تعرف الصاحب من اللي معاديك

واكثر كلام الناس بالمكر والبوق

يهرج معك واليا تِقَفَّيت يرميك

المال دايم صاحبه مرتفع فوق

والقل خايب لو تَرَفَّعْت يرْخِيك

أوصيك بالطيِّب إذا كان لك ذوق

إرمه وراك ولازمٍ إنه يلاقيك

يا العبد هوِّن كل مطرُود ملحُوق

لا تِشْتَحِن لك رَب ما هُو مخليك

اللي جعل لك رُوح جاعلك مرزُوق

كما تَكفَّل بك من الخلق كافيك

يعطي وباب الرِّزق ما هُو بمغلوق

واليا طلبته وانت محتاج يعطيك

يا زبن ودعناك في يوم الاثنين

لعلها لك يا خو صنعا مسافير

بجيرة الله يا عشير الغلامين

يا مقفي عنا ذكرناك بالخير

نغليك يوم إنك بعيد عن الشين

وريف لضيفك في ليال المعاسير

يوم تغيبه عندنا قدر عامين

ويوم نشوفك فيه عز وتباشير

هذا الفراق اللي نظرناه بالعين

وعز الله انك ناوي بالمحادير

على النوى علمي بهم هجعة الليل

نجل العيون من البكا كحلها سال

واليوم غير الياس قل المراسيل

يا من يطمني عسى ليلهم طال

الله على اللي ما صفط لي غرابيل

لاشك شرع الحب هم وغربال

قفى ولي في حجر عينه تعاليل

تقول يا ذا البعد نجزيك بوصال

وتعلقت روح الليالي المقابيل

و يا عنك ما يامن من الوقت رجال

حنا ولا من قلت حنا تحنا

كل الكلام بعطر تاريخ الاجداد

المجد هم وهام فينا وغنا

حتى علينا من على روس الاشهاد

يا كبر حظ الي نخانا و ثنا

نشد له فوق الفخر سرج وشداد

ان هلل التاريخ غطرف وطنا

وان سولفو عنا رجاجيل واجواد

وان بان لك شمس ترى ذيك حنا

نشرق مدام الظلم ظلما وحساد

حنا البدو يابنت هذا لحنا

نحبك اكثر لاغدى حبك جهاد

وحنا البدو يا بنت لامن نخنا

بناتنا يثالث العيد الاعياد

يا سخيف الذّرعان مأني بمرجوج

رجتني الدّنيا غدر وحيله

يا بنت لولا اللّي على تاسع الفوج

تركت نجد وعزوتي بالقبيله

لا شك حاديني على نجد هيدوج

مسقي الفيافي لين يدرج مسيله

تركي ليا من اللّيالي غدن عوج

حمله عتيبه كلها ما تشيله

برسي كما ميناء البواخر على الموج

ومن وين ماصك البحر يرتكي له