شعر كويتي باللهجة الكويتية الأصيلة

لولا ظلام الليل مابيّن الصبح ولولا المواقف ماتبان الرجالي ولولا الغرق محدٍ تعلم على السبح ولولا الفرج خاويت سود الليالي ولولا الخساره تنعدم قيمة الربح ولولا وجودك انت عزي لحالي غلاك ذابحني وانا قابل الذبح لو منت غالي كان مارخصت غالي لاتلتفت للهرج يامبعد الشبح هرج القفا طبع الردي لاتبالي الكلب حول البيت يكثر من النبح والذيب يعوي بالرجوم الطوالي وانا معك من غيبة الشمس للصبح والصبح روح وخل طيفك قبالي

لا حرام أكرهك وانت الحلال الحرام ليه احملك ذنب الحب وذنوبي ليه أجي كارهٍ نصفي وصوتي هدام احفر عيوب غيري وادفن عيوبي ليه أناديك حلم العمر تحت الظلام وانت وجهٍ تلاشى فيه عذروبي عيبك إنك تشب النار برد وسلام ما تقول احرقي يا نار محبوبي ما حيا الصدق فيك إلا بموت الكلام ولا رضيت الشروق إلا على غروبي قبل اعرف السهر من قبل اعرف المنام كنت أحبك وأحب الليل ودروبي جيت أبكرهك طاح القلب عشب وحمام والتوى طفل يبكي في طرف ثوبي

قلٍقْ وأنتَ ترتب ف الحنايا فلسفة تغريب تهندم داخلي مشط وعباة وبنت جذابه تسولف لي كأني بعد لحظه راحل وباغيب وأنا مزروع بأطراف المكان وقافلٍ بابه يقولون بتعب : ماكل هالدنيا مراحل طيب وأنا مليت أصب الطيب بيد الكل وأرتابه أحس الشعر شاحب والمراحل هكذا تجريب لذا أشعر بأن الظن صدق العلم ينتابه تصدق! كل أنثى موغله بالعشق والتثريب خذت من دفتري لشعورها ماكنت أعيا به وكبّته لحبيبٍ كان يعنيها وأنا ماطيب جروحي نفسها والجرح عايش بي واحيابه شاقول وانت تدري كل ماهميت قالوا عيب يخافون الغنا اللي دمعة الخفاق بأسبابه

على متن الألم سافِر واترك لي مجاديفك ولا تنسى تلوّح لي .. تذكرني بغيباتك وخذ وقتك من أيامي وخذ من ليلتي طيفك وخذ ماضي بنى صرحه على وهمك وكذباتك ولو يِشقى العمر بعدك شقى عمري دهر زيفك أنا مابيك تنظر لي .. أبيك تناظر مراتك تمعن في تقاطيعك وانت احكم على كيفك بدون قناع أبي تحكم على وجهٍ سكن ذاتك خدعني همسك الكاذب غمرني بالمطر صيفك وكنت أفرح ولا أعرف نهاية كذب همساتك فقدت أحلامي بحضنك رحلت اتبع سواليفك معاها خطوة ابخطوة وخانتني مسافاتك حبيبي لملّم شتاتك ورحب بالألم .. ضيفك ولا ترجع تلوّح لي خلاص اعتدت غيباتك

رحلت و لا دريت و لا تركت إلا الغياب المر و صوتك ينفض الدنيا في وجداني انكسار و هم اقول انساك و تتساقط حضور وسيرتك تمطر اقول اذكرك و يذبحني حنين و جرح يتلملم انا اذكر كل تفاصيلك , كلامك , ضحكتك , و اذكر مساءك بشتك الاسود صباحك بشتك الادعم سجودك بالمطار هناك حنان بقلبك الاخضر ياليت الموت مثل الوقت يتأخر و يتقدم انا المفجوع ابوس صورتك في كل يوم يمر وانا الباقي من الباقي من الباقي و عمر اظلم انا الغصن اللي من جابر رحل اصبح غصن اصفر ينام الحزن في قلبي و قلبي برجعتك يحلم انا من رحت ما أملك سوى امشي و اتعثر بكلم كل شي عنك و لا ألقى لجروحي فم

البحر هذي حدود البحر من يرفع شراعه قلت أنا والريح قلت الريح بإذن الله تطيعك والزعل قلت الزعل ماهو لمن مثلي بضاعه وأنت بعضك يارفيق العمر يكفي عن جميعك مايبعدني مكان ولاتغيرني قطاعه كم قسى باكر بوصلك قلت ياباكر تبيعك والزمن قلت الزمن ماهو قليل إن غبت ساعه ما استطيعه وأنت اشلون لاغبت أستطيعك إشتريتك بالف صبر وألف سمع وألف طاعه شوف كم مرة شريت ارضاك مافكرت أبيعك كنت في عمري يقين وصرت لا حساسي قناعه من شرب صيفك وضم اشتاك يستاهل ربيعك