شعر عراقي باللهجة العراقية الأصيلة

سبحان الفرح بشفافك ألوان من تضحك تصير الدنيا بستان وسبحان النسيم اللي يمر بيك يسلّم ع الرّمش والرّمش نعسان وسبحان الحلاوة التحت العيون وسبحان الضوه الخجلان والغيران سبحانك خميلة عيد ومراجيح وسبحان الثمر ع الصدر ريان سبحانك يحلو الطول يمگمّر سبحانك... وألف... سبحان

اشك بچفوف اديه وما أشك بيك واغار عليك يْبيَّض غيرة النسوان اشلون اجمع وافرزن هاي من هاي وانه بحبك ولا خليت ميزان؟ أفز من نومتي خاف انتَ سهران وانومك عَ الرمش وأسهر للآذان يخصرك مستحه وطولك مواويل لضوگك من لهاتك وظل سكران! أخلص سنيني لعيونك مواعيد وأعيِّد بيكِ كل يوم بأَلف عيد تگلي جيس خصري وبوسني هناك هو انتَ عندك خصر ينجاس بالأيد؟

وياك وياك ، ياطير الحمام وياك وياك ، وصلي سلام گله وحچيله عليا شوف هجره أسوا بيا فراگ الأحباب حرام وياك وياك .. گله عذبني حنيني .. لاخبر منه يجيني لشوفته مشتاگه عيني ... الليل ماتغفى وتنام گله من بعدك ياغالي .. المن أشكي هذا حالي غايب أنتَّ وعلى بالي ... عشرتك وأحلى الكلام گله هذا العمر شمعه .. يذوب دمعه على دمعه ليش من عدنه نضيعه... ياعمر للناس دام

يبقى العراق يبقى ألاقوى تاريخ وناس وگاع لو عثر يمه أسم الله ينهض يگوم أبساع هوا ألاصل هوا الفصل عروگ الجسد ما تنفصل تضيع دنيا يضيع زمن يبقى العراق عراق عمره العراق ماضاع

روحي ابليالي الشوگ گمره وشمعات للعاشگ اعيوني ضايع ابشوگي وهوه العشره واعتب على من ضيعوني اهنا يالتضيعوني اشتضيعون گلبي الهوه والشوگ ذابه تانيتكم يم درب الضعون غنيت دگي يا ربابه لا خبر.. چنكم ما ترجعون حتّه الهوه سدّيتو بابه واعلگت عمري اشموع عشره طشيتها ورايد تجوني جيت آنه ليكم ألف مرّه (وعن دشّت الباب امنعوني)

يالتسئلوني اعله الوطن هو الوطن وينه .. هو الوطن وينه مركبنا تايه بالبحر كثرو ربابينه .. كثرو ربابينه الجمل طايح يالربع كثرة سكاكينه..كثرة سكاكينه عاثو بيه الغربان .. زادوها الامريكان ياوسفه ضاعت للأبد أيامنا الزينه ..أيامنا الزينه يالتسئلونى اعله الوطن ادري الوطن غالى ..ادرى الوطن غالى اضوي اله كل العمر ما وفى الغالي..ما وفى الغالي الوطن بيت وأمان..لا ظلم لا طغيان . ياوسفه ضاعت للأبد ايامنه الزينه ..أيامنا الزينه يالتسئلوني اعله الوطن روحو اسئلو الذئاب تتناحر اطياف وملل خدمتا لللا رهاب يا وطني المسكين..تعاني الك اسنين ياوسفه ضاعت للأبد ايامنه الزينه..أيامنا الزينه