شعر إماراتي باللهجة الإماراتية الأصيلة

تفرقنا السنين ونجتمع والجرح نفس الجرح

على درب الفراق دموعنا تسبق خطاوينا

شرحت ظروفنا للوقت لكن ما فهم للشرح

صبرنا والصبر جمره ورا الاضلاع كاوينا

ترى وجه المتيم لو تبسم لاتحسبه مرح

امانيه اتهاوى من عيونه مثل امانينا

بنى من ذكرياته في محيط العاطفه كم صرح

لكن هاج المحيط ومالقى له ساحل ومينا

ياناس العيد ما له لون ولا له طعم ولا له فرح

واذا قلتوا وش الأسباب قلت الله يعافينا

أوضَحْ من الشّمسْ شِعْري يوم اغَنِّي بِهْ

تبْهرْ مَعَانِيهْ مَسْموعهْ ومكتوبهْ

لا ما أعِيْبِهْ ولا ارضى حَدٍ يْعِيبهْ

أسْهَرْ عليه الليالي أَنْفِي عْيوبهْ

من عادتي في الشِّعر أنّي أحَلِّي بهْ

مجالسٍ عن صغارْ النّاس مَحْجوبهْ

ما اغمِزْ ولا المِز ولا اجْرَحْ بهْ ولا اْذي به

ثوبي وكل شاعرٍ لِهْ في الشّعِر ثوبه

واللّي تظِنّهْ وبَعْضْ الظَِّنّ والرِّيبهْ

إثمٍ ومن ظَنّ يسْتغْفِرْ عن ذْنوبهْ

يا أمي يا غلا الدنيا وأصدق عاطفه في الكون

وأدفا حضن يحضني .. وأكبر قلب يحويني

أنا بك دنيتي جنه وبسماتك مطر ومزون

وضحكاتك ربيع أخضر زهوره فتحت فيني

إذا شفتك أرى الدنيا صباح بالفرح مسكون

واذا غبتي عن عيوني يغيب النور عن عيني

عشقتك والهوى طفل ربا في خافقي المفتون

كبر هذا الطفل واصبح غرامه يسبق سنيني

أنا يا أمي .. أنا يا أمي ما أفيك مهما يكون

جميلك دين في عمري .. وربي بك موصيني

حب الوطن ما هو مجرد حكايه

أو كلمة تنقال في أعذب أسلوب

حب الوطن إخلاص .. مبدأ وغايه

تبصر به عيون وتنبض به قلوب

حب الوطن .. احساس يملا حشايه

وانا بدونه في الأمم غير محسوب

موجود في دمي وكامل عضايه

سامي وهو للنفس غالي ومرغوب

لك يا وطنا في سما المجد رايه

واسمك عليها باحرف العز مكتوب

الله يا زين الزعل في محيّاك

من شاف زينك ما تمناك ترضين

كلّك حلى لكن زعل وجهك أحلاك

ما احلاك من بعد الزعل يوم تهدين

ما شفت غيرك يشبهك في مزاياك

و ما شفت مثلي حايرٍ بين حالين

حتى ظلالك خايفٍ ما اتعدّاك

كنّه تهوّب خطوتك يوم تمشين

ما ظن تقدر كلمتك تلمس شفاك

وانفاس صدرك تلهبك يوم تحكين

ما كن قلب أنثى حملتيه باحشاك

يا رحمة الله بالبشر يوم تقسين

لا لا تلوم اللي طموحه ساكن ف صدر ٍ رحب

لا لا تلومه لو جميع الناس فارقته شبل

صغير لكن عزبته نجمه واقدامه سحب

صغير لكن ما يدوس الا على عالي الجبل

نفسه ملففها بسلاسل ودها فيوم ٍ تحب

تجوع بس تاكل في صحن الدين والكاس النبل

يقول يوم اجذبته العليا ودوّر مصطحب

ما شاف تحته غير صخرة حقد تربطه بحبل

من بين جذب الجاذبيه والسما صار السحب

احيان يفرح كالقمر واحيان يفرح كالخبل

لكن بفضل العالي وكثر الترجي والنحب

قام يتقدم للعلى والحلم دوّرله سبل