شعر فخر بالقبيلة وقصائد عز بالأصل والربع

ربعي هل الفزعات في حزة الياس

وطاريهم عالي ويرقى لعليا

وهم عيال أصلٍ وللمجد حرّاس

مواقفهم بيضٍ وتسطع جليّا

وقفاتهم تجلي صدى ليل هوجاس

يضحك لها وجه الزمن والمحيّا

ربع ن لهم في قمة المجد مرقاب

بيت ن ذرى للضيف ويصون جاره

تاريخهم يقرا على فج الاطناب

صيت ن بنوه وصار للعز شاره

حق القصير مثبت ن بين الاشناب

في ضفنا يرتاح من حر ناره

والجار له تقدير وافي ولا خاب

مكرم وتفرش بالمعزه دياره

تربينا على العزة ورثنا شامخ الاصول

ونفخر بالفعول اللي رقت في قمة الأمجادي

لنا مجلس يذرّي من نصاه ويحمل الحمول

نجود بما عطانا الله وتسبق بالوفا أيادي

ليا منا نطقنا كلمةٍ تسبق بها الفعول

ونقهر قسوة الدنيا بعزمٍ يقدح الزنادي

ولا عاق الزمن خطوة رقينا والمدى يطول

ولا ملّت ركايبنا المساري وارتخى شدادي

كرمنا يبهر عيون البخيل ويصنع الذهول

ونعطي من كرامتنا قبل لا يطلب المنادي

يوم النوايب والمقادير صلفين

والهم خيّم فوق عالي جبيني

جرّيت صوتي للرجال المسمّين

كلٍ تعزوى قال انا لك يميني

فزوا بصدقٍ ما يبون النياشين

صاروا لعيني سور عزٍ حصيني

ربعي على درب الصعيبات وافين

بأفعالهم تقصر طوال السنيني

يوم احتدم عج الرمك والميادين

بانوا عزاوي تبهج المبتليني

ربعٍ على كسب النواميس شفقين

والمجد في كف النشاما يبيني

حي من هم بالكرم والوفا ربعٍ كرام

كاسبين الطايلة من عظيم أمجادها

بيتهم يندا شحم في مقاديم الزحام

مشرّعٍ للضيف ما صك دون أجوادها

دلةٍ ما تبرد وصبها يجلي العسام

فوحها من جمرةٍ ما طفى ميقادها

سلام يا جمعٍ يدوس العراقيل

قومٍ لهم في قمة المجد مدّه

الراي واحد ما يبيله دواليل

والصوت واحد والمواقف تشدّه

وقفاتهم للحق مثل القناديل

يوم الردي ضاقت عليه المخدّه

وقت القسا شالوا كبار المحاميل

والجور دايم بالعدالة تردّه

عزوة هل الفعل في وضح النهار

ترسى مواقيفهم روس الجبال

شيبانهم حكمةٍ تكسي الوقار

حكّام رايٍ يحلّون المُحال

أفعال شبّابهم مثل الشّرار

فزعاتهم في دجى العسرة زلال

شبل النّدى لا غشى الجوّ الغبار

يورد حياض الخطر يوم القتال

سيفٍ صقيلٍ يدمّر من يغار

ودرعٍ يردّ العدا ساح النّزال

طاري كرام القوم بالشوق دعاني

صوب المجالس والديار الفسيحه

صغت القوافي من جزيلات المعاني

شهادةٍ بين الخلايق فصيحه

ريف النشاما لا قسى هالزماني

منصى الضيوف المتعبة والجريحه

قلوبهم تنبض وفا مع تفاني

أفعالهم للضايقين المريحه

يبنون من طيب المواقف مباني

وأمجادهم في كل قمة صريحه

لا طاح في خيل الليالي حصاني

ألقى بهم عز النفوس الطريحه

ربعي ليا ثار الدخن والزماجير

درع ٍ يصد النايبات الثقيله

وإن طوّقتنا موجعات المقادير

وقفاتهم تشفي الكبود الغليله

لا شبّت الهيجا بنار المساعير

تلقى لهم بالضيق فزعه جليله

يبين الأصل في وقت التجاريب

بفعلٍ دون هرجه ما تذرّع

كريم الساس ما فيه العذاريب

وعن درب المهونة يتورّع

ليا اشتدت على القوم المصاعيب

تشوفه في الشدايد ما تخرّع

وبعض الناس في كثر المكاذيب

يحسب إنه على العليا تربّع

ألا يا عزوتي يا اغلى حلالي

ذراني في صواديف الزماني

بكم يرفع مقامي لا طرالي

مواقفكم مثل حد السناني

حزام الظهر لا ضاق المجالي

وفزعتكم يرجحها البياني

لكم في الصدر تقديرٍ مثالي

غلاكم راسخٍ وسط الكياني

خذيتوا بالوفا كسب المعالي

وطيب الذكر يرويه اللساني

نخوة عزيز تجلي عماس الهموم

وقفات يمنى في الشدايد نادره

الصاحب اللي بالمراجل له عزوم

يمناه للكسر المجرح جابره

قول وفعل ما تغطيه الغيوم

يبرى بها جرح القلوب الصابره

يا حي قرمٍ في مهمات الحسوم

والنفس من كسب الجمايل عامره

وش جاب حرٍ سيرته فوق النجوم

للي يمينه عن دروبك قاصره

الفزعة كلمة وزنها صم الرجوم

بأوصافها صدر التواريخ زاخره