شعر عن الرجال الكفو - قصائد المرجلة والشهامة

لا صار مال الرجل مبدا و شيمه

و لا له مع اهل الطيب وجه ٍو لا جاه

الطيب يبغى له رجالٍ مشاكيل

فالضيق والا فالسعة تفتح الباب

واللي يبي كلمة نعم يا رياجيل

ينطح مواجيب الجماعة والاصحاب

من طاب ابوه يطيب ويقلط الحيل

ومن خاب ابوه يقال لا من كبر خاب

الحر ما ينفع بليا مخاليب

والعقل للرجّال زينه وهيبه

بعض المنابت بالمراجل عذاريب

وبعض المنابت للمراجل خصيبه

رجلٍ يبى طاريه عند الاشانيب

ورجلٍ يبى طاريه عند الحبيبه

ورجلٍ يغض الطرف عن جارة صحيب

ورجلٍ عيونة فى محارم صحيبه

ورجلٍ يغيب و يفقدونه هل الطيب

ورجلٍ ليامن غاب ماحدٍ دريبه

يا صغيّر ما يكبرني لقب

وما يصغرني إذا انكرني صغير

ما خذينا الصيت من جمع الذهب

ولا نسابة شيخ او قربة وزير

كاسبينه من هل السيف الحدب

الجنايز كان ما جاك النذير

بالوفا تاريخ أبيض ينتصب

لا حكوا بالحق حيين الضمير

ما أذل وراسي يشم المهب

لو بقى من شمر طفلٍ غرير

كم قلت لك يا ولد

ذيب السنين انسجن

ما للمواقف أحَد

إلا ويدفع ثمن

وان كان بيرك ركَد

تبي تشوف العطن

وان حاصرك هالرمد

ارفع عيونك وغن

ما يبين الطيب الا في الشدايد

في نهار يصير حملك فيه كايد

يظهر الصنديد في صف الجماعه

وينثبر من يشتري مدح الجرايد

وان رجعنا للمطامع والمراجل

مانضريها على نوم الوسايد

ما يمثل شاعر الوقفات نفسه

غيرذخر للقريب وكل نايد

كل عود ازرق لافاح يجيك طيبه

فال من لايرتجف يوم الطرايد

لا غشاك الليل واسرف بك الحزن العميق

جنّب وجيه البشر واسجد لخلاّقها

خل روحك تدّرج من زفير اليا شهيق

دمعة ٍ لحضورها دمعة ٍ لفراقها

الحزن دافع قوي للرجال ولا يعيق

غير ناس ٍ تخلق وذلّها فاعناقها

وانت حاضرك يتفاخر بماضيك العريق

شجرة ٍ عجز الزمن لا يحت اوراقها

وكان عزمك ما رقى قمة الضلع المويق

ما انت لاقي عز في جلالها ودقاقها

وأعلا معاديل الرياجيل الأنصاف

واللي طرق باب المراجل طرقها

وترى الرجال أشكال وأزوال وأصناف

سبحان من يفنى النفوس وخلقها

أهل المواقف كل ما حان ميقاف

امن الفخر والفعل ينضح عرقها

رجلٍ علي العليا مكانه وينشاف

خلد هروجه فالفعول أوثقها

للعقد حلالٍ وللصعب عساف

عسف المراجل والصعايب عشقها

كم لي وانا اشير للموضوع وانوّه

وكم حاجتن مستحي منها وكاميها

اجامل الي ماحد يصبر على جوّه

وامشي الي ماحد يقدر يمشيها

وانا لساني فصيح وعندي جروّه

وبإمكاني اسمي الاشياء بأساميها

المرجلة كايدة والكايد شروطه

ماطيب أهل الردى كثرة مهايطها

وأفعال ربعي بلوح المجد مخطوطه

قومن على المرجلة ربي مسلطها

لاتظلم الغير خل النفس مربوطه

سود النوايا تراني كاشف خططها

خلّك خوي ٍ ما يخلّي خويّه

ولا ّ ترى يابوك ماحدٍ مخاويك

وشرواك يا شوق المها الغشمريّه

على المراجل ماخذٍ صك تمليك

مكانتك مابين هذي و ذيّه

و مواقفك عن فاخر المدح تغنيك

والحب مثل الارض و الجاذبيّه

لولاه ماني حيّ قدمك و احاكيك

يعيش الذي يبني من المجد متكى

حياته فخر وان مات تذكر فعايله

ليا حل ذكره قالت الناس والنعم

تشبه به العربان واطيب خصايله

ولا يرفع الرجال ماضي جماعته

اذا ما رفع نفسه فلا أحدٍ بشايله

يحفظ الامانه والعهد يوم يؤتمن

على السرّ صندوقه مكينٍ قفايله

واهني الصخره اللي مايحرقها سموم

الزمان اللي يهد العزم ما هدّها

كل ماكبرت وضاقت على عيال الرخوم

نحتزم لأكبر مصيبه وناطا خدّها

ياعيال آدم وحوّا تراها ما تدوم

دورة الأيام لابدّها لابدّها

جات في سد الشوارب وفي سد الخشوم

كبّر الضيفه وعش الضيوف وغدّها

والمراجل ماتوفى بضافية الهدوم

كود بسيوفٍ يشوق النواظر حدّها

عليك الفرج ياالله ياحي ياقيّوم

سامحني ترى العلم فيه علوم

طرات الرجل لا لحقه من الزمان هموم

ما يدري بسده كود خيرة بني عمه

وسيع البنايد في الشدايد قوي عزوم

لعظك زمانك شال همّك مع همّه

وانا والله اني ماتهنى بحلو النوم

ورفيقي عليه هموم الايام ملتمه

ودنا بالطيب لكن الدهر جحاد طيب

كل ما تخلص مع الناس كنك تغشها

يدك لامدت وفاء لاتحرى وش تجيب

كان جاتك سالمه حب يدك وخشها

كل ماشبيت نار المحبه مع حبيب

قام يسحل في مشاهيبها ويرشها

وكل ما واجهت لك فالزمن وجه غريب

مثل ماقال المثل دام تمشي مشها

كان الرجوله بالمظاهر والاشكال

عز الله اني ما عرفت الرجوله

وكان الرجوله بالمواقف والافعال

عز الله اني مرتوي يا خجوله

ما كل من كشخ من الناس رجال

الشخص جوهر وافهمي ما اقوله

وانا رقيت المجد رجال رجّال

ياصاحبي حتى وصلت الرجوله

آقف وتاقف هامتي كني جبال

والعن زمان الذل واللي خضعوله

حرت مدري وش اوضاع الزمان الجديد

شفت فيه المكر طيبه و طيبه مكر

شفت أغرب مفاهيمه طغت ف العديد

كنت في خاطري أسأل و رحت افتكر

ليه قيل الغني لازم يكون السعيد

ليه قيل الغني كل الفرح محتكر

شفت حاكم مريض و ثروته ما تفيد

و شفت مؤمن سعيد و مسكنه في وكر

يوم كل صرخ ان الرجولة بليد

جيت شاعر ثبت ان الرجولة فكر