شعر حزين وقصائد مؤلمة معبرة

تخفّت دمعةٍ بالسرّ وانسلّت

ولا حسّوا بها ربعي وخلاني

مشت من وحشة الخفّاق وتولّت

تشبّ النار في قلبي ووجداني

شكت من لوعة الكتمان ما قلّت

وتاكل من بقايا صبري الفاني

أرسم على وجهي ملامح طموحي

والعين يقرا حزنها كل لمّاح

ألبس ثياب الضحك واكتم جموحي

والصدر تعصف به صواديف وارياح

أستر خفايا لوعةٍ لا تبوحي

والدمع في محجر عيوني ولا طاح

راحت طموحاتي بعصف الذواري

واقفت بها صلف الرياح المراسيل

أجمع شتات العمر وأتبع طواري

وأجر من ضيقة خفوقي مواويل

اليوم جفّت من ظماي المحاري

طاحت من يدين الليالي قناديل

صبرت وما بقى ليلن طويلن ما سريت أقصاه

وتذبحني طواري الشوق لا هبت ذعاذعها

خذاني الياس وأتعبني خفوقن طال به مسراه

وروحي من كثر ما تنتظر شابت مسامعها

أنا يا لوعة الفرقى طريقي ضاق به مسعاه

ألم شتات أنفاسي وبيديني أودعها

طاح صرح الوصل واستوطن الصدر غم

وانطوت صفحة اللقيا بليل الغياب

غابت الشمس والمنزال عقبك عدم

واستضاق الفضا وانكفّ وجه الرحاب

أطرد طيوفك اللي عوّدت بي وهم

وأثر بعض الأماني تاليتها سراب

كل ما سجّ قلبي قام جرحي يزمّ

من صوابٍ بصدري فاق كل المصاب

كل ما ذعذع الغربي بذكرك نسم

هلّ وبل المحاجر لين بلّ الثياب

يا وجودي على اللي حطّ فوقه رجم

واستقرّت به الخطوة بدار الثواب

وش يفيد التوجّد والعنا والندم

ما يرجّع فقيدٍ في بطون التراب

كل ما حسبت الجرح طاف المحاذير

عاود على صدري بضيقٍ وبلوى

يبرى وأقول انزاح دق المسامير

وأثر الوجع بين المعاليق يلوى

ينقض عليّ ليا طوتني التفاكير

وتضيق بي دنياي من دون جدوى

في ذمتي ما عاد بالصبر تأثير

أبطيت أكابر وأتذرّى بسلوى

ما فاد به طبٍ وكثر المشاوير

ما عاد في كف المداوين رجوى

يا صاحبي والجرح يطلب تفاسير

وش عاد باقي من طعونك وتسوى

يا وجد روحي من صروف المقادير

وجد العليل اللي يدوّر لمأوى

لوّحت والريح تاخذ نصّ سلواني

والنصّ الآخر طعنّي بالسكاكيني

وقّفت أرتّب يباسي داخل أغصاني

حتى تساقط خريفه من نظر عيني

مدّيت له غيمتي من دمّ شرياني

وشلون يجحد مطر عشبي ويظميني

ما كنّه اللي خذا شمسي من أوطاني

وأقفى وخلّى كفيف الدرب يبكيني

ركضت أدوّر بصوته بحّة ألحاني

أثره سرق ضحكتي واستعذب ونيني

يا كبر كذبة بقاه وصدق حرماني

والجرح يكبر ويتمدّد بتكويني

حاولت أرتّق ثياب الوصل وحداني

والوقت يفتق جروحٍ بينه وبيني

كل ما جابوا مجاله عرق تلّي

وابتدا ليل المآسي والشكايا

ودي ادله واحسب ان الهم زلّي

لين شفت الحزن يكسر بالمرايا

شبت النيران في صمتي وكلّي

وافضحت دمعٍ تستر في الطوايا

طيفه اللي في عروقي مستحلّي

ساقني للموت في ركب الضحايا

يا عيوني جاوبي دمعٍ مولّي

وانحري خيل الصبر قبل السرايا

ما بقالي غير ياسي تحت ظلّي

من جروحٍ ما تداويها العطايا

لوعةٍ بين الحنايا ما تخلّي

تنهش ضلوع الشقا بين الخلايا

من لهيب الشوق روحي تستصلّي

تحترق من جور بقعا والرزايا

خيم على وجه الزمن حزن وغيوم

والشوق يذري خافقي مثل الأرياح

أدري بإنك رحت والوقت محتوم

ومراكب الذكرى تكسّر بالألواح

ناديت لك والشوق في القلب مرسوم

والدمع من غيم المآقي لك انساح

طيفك يمر العين والليل محموم

ويجرح خفوقي كل ما بارقٍ لاح

واقف على باب المتاهات مصدوم

والعمر من كثر التحاسيف نزّاح

ما عاد لي في سكة الوصل مقسوم

باب اللقا مقفول والصبر ينباح

يا وجد روحي وجد من طاح مضيوم

يشكي قهر دنياه والدمع فضّاح

رمح الفراق اللي بالاضلاع مسموم

أدمى عروقي والأمل باللقا شاح

يا وحشة الليل يوم أقبلت وحداني

والروح من لوعة الفرقا بمرقابه

كل ما طوى غيمة النسيان وجداني

هب الحنين القديم وشرّع أبوابه

جالس مع الصمت والظلما وتلقاني

أخفي جروحي وعيني هلّت سحابه

يا غبة الهم موجك يغرق شطآني

وشراع قلبي تهاوى فوق أخشابه

وحدي أجر الحسايف بين خذلاني

والحزن ذيبٍ يمزّق روحي بْنابه

يا ليل محّد درى بالحزن لا جاني

إلا جدار السكيك ووحشة ترابه

أغزل خيوط الأمل في نول حرماني

وأكسي جروحي بثوبٍ يستر غيابه

أدوّر النور في عتمات بيباني

وألقى الظلام الثقيل يْلمّ أسرابه

وقفت بدار من قفى أودع ماضي الأعوام

وأشوف الدرب من عقبه ظلامٍ كل ضي يطفى

طعني بالرحيل اللي كسر بالصدر عوج عظام

وخلاني مع الأحزان تايه ما لقيت مرفى

أكابر في وجع روحي وأداري طعنة الأقوام

وأنا جرحي من الفرقا نزف دمه ولا يرفى

تناثر حلمي الغالي على كف الثرى حطام

يبس غصن الغلا عقبه ومات العشب في المنفى

سهرت الليل وعيوني تعانق حزنها الهدام

أدور للوصل دربٍ ولا أشوف الفرح يلفى

وقفت أضحك بوجه الريح كأني فارسٍ مقدام

وأنا روحي من الداخل تهاوى للثرى تُكفى

ألا يا قسوة الفرقا رمتني بالخفا بسهام

نزف دمي على شانه وهو من حسرتي يُعفى

قسم بالله من يومه شربت المر والأسقام

أدور طيفه الغايب وأفز وداخلي يهفى

ألا ياليت طيف اللي هويته في خيالي حام

يواسي دمعة المشتاق قبل إن الكفن يُضفى

أداري طعون الوقت في صدري ولا أدري

متى هالحزن ياطا على الروح وأهدابي

ثمان سنين وأكابر وأقول إن الفرج بدري

وأنا كل ما ضحك سني غزا طعن الزمن نابي

أخاوي عتيم الليل وأكتم صدى قهري

وأكفن حسرةٍ طالت وتاهت بين محرابي

أشب النار في جوفي وتاكل من حطب عمري

وأرجي غيمةٍ تمطر تبل عروق أعشابي

يشوف الناس ضحكاتي وأقول إن الرضا عذري

محد حس بظلام الفقد لا عاث بأعصابي

تصدع عظمي القاسي وليلٍ في الحشا يسري

تحطم في حنايا الروح غصنٍ مات بغيابي

أكتم الآه في جوفي وطال من الوجع سهري

وخليت العتب للريح تاخذ قسوة أتعابي

أنا وش حيلتي والوقت يحفر بالأسى قبري

وأنا اللي كل ما أقبلت صدو كل أصحابي

شربت المر من كاس العنا وما رخص قدري

وعفت وجيه خلانٍ تدور كسر أبوابي

كل ما جن الظلام وطيف الأحباب انبهم

روحت سحب المدامع واستهلت غيومها

أجمع أشباه الرجاوي بين شك وبين وهم

والضلوع العوج تشكي من لواهيب سمومها

من عذابٍ في عروقي شرب دمي والتهم

لين هلت دمعة العين وافضحت مكتومها

وحشةٍ تسري بصدري في دجى الليل البهم

تكسر أفراح الخفوق وتستبد بظلومها

ذكرياتٍ من جمر تاكل شبابي في نهم

تحرق أوراق العمر وتغتال باقي حلومها

تايهٍ في سكة الفرقا وحظي المتهم

والحنايا تختنق ما ترجمت مفهومها

كن ساعات الليالي جيش زحافٍ دهم

يستبيح أسوار روحي ما رحم مهزومها

الخطاوي تايهة والدرب الأظلم ما انفهم

والمقادير استدارت واقبلت بمرسومها

طال صبري والخفوق من الطواري منزهم

طفت أنوار الأماني وانطوت بنجومها

جفت أقلام المعاني والقصيد اللي ملهم

يرتجي نور الصباح ويحتري لرسومها

يا حزن قلبي لو يطوّل طوافه

والشوق في ليل المفارق طعنّي

القلب عاف الناس واعلن عيافه

من يوم غاب اللي بشوفه فتنّي

الدمع يكتب في خفوقي رجافه

من لوعةٍ بين الحنايا تعنّي

وين المكان اللي سهرنا ضفافه

واليوم موج الحزن جاني يغنّي

يا وجد عيني والمقادير آفه

تاخذ غلاي اللي بقلبه سكنّي

اشكي لرب البيت طول المسافه

والوقت من فقد الحبايب محنّي

هذا خفوقي جاك يعلن حسافه

مات الفرح بعده وخاب التظنّي

يا ورد عمري ما لحقنا قطافه

يوم افترقنا خيّب الوقت ظنّي

صوت الندى يبكي ويشكي جفافه

والصمت من بعد المفارق سجنّي

يا ليت وقتٍ فات يعطي سلافه

واشوف زوله في منامي يعنّي

غشى ليل صمتي من طواري الجفا أشباح

ونفسي على فرقى وليف الغلا ملتاحه

رحل ما ترك لي غير دمعٍ على الألواح

وعينٍ من الحرمان عقبه غدت سياحه

خذته الليالي في سكوتٍ بليا صياح

وماتت على شط الرجا والوهم ملاحه

أدور بقايا ريحته في شذى الأرواح

وألقى عهود العشق في خافقي فواحه

أيا ليت وقتي قبل يقفي عطاني سماح

أضمه واقبل غرةٍ بالنقا وضاحه

كواني غيابه كيةٍ ما وراها صحاح

وبانت خفايا الروح من لوعتي نواحه

أكابر وأخفي لوعتي والأمل منزاح

وغديت الكسير اللي زمانه كسر جناحه

تخيلت زوله كل ما بارق الليل لاح

وفزيت أدور في فيافي العمر واحه

أثاري سراب البيد يكذب على السواح

ومن يطرد المقفي شكى قسوة مطياحه

سقى الله ليالي ودنا والغدير قراح

قبل تذبل غصون الغلا في ثرى براحه

يا شين الوداع اللي بلا موعدٍ وإفصاح

يخلي عروق القلب بالدم نضاحه

إن طرى طاريك مرّ بداخل الصدر وكوى

هلت الدمعه وتخطت من محاجرها سدود

ولّع الشوق العتيق بمهجتي جمر الجوى

وانفلت حبل الصبر واطلق من ايديني قيود

كم كتمت الدمع لكن غصب من عيني هوى

كنّه المزن الثقيل اللي تصاحبه الرعود

خافقي من ليعة الفرقا بعد عينك خوى

والمشاعر من غيابك صابها ثلج وبرود

لا تظن الدمع من ليل المفارق ارعوى

يوم بان الشوق فيني والمحاجر لي شهود

طيفك اللي في زوايا الذاكره عاش وانزوى

كل ما غمضت عيني عاد باحلامي يزود

لا سمعت اسمك تهاوى ضلعي اللي ما قوى

وامتنع جفني يذوق النوم او يهنى رقود

غصن حبك في حنايا الصدر مال وما غوى

باقيٍ عرق المحبه والوفا ماله جحود

صوت هجرانك بصدري بين اضلاعي دوى

كيف طاوعك التجافي وانتهت ذيك العهود

غرس قلبي من جفاف البعد يا خلي ذوى

ماتت ازهار الاماني وانتهى عطر الورود

من يلوم اللي من اسباب المفارق التوى

عايشٍ كنّه غريبٍ تايهٍ ماله حدود

عطتني يمين الوقت حلمٍ كبرت ارجيه

وتاخذ بيسراها سنيني مع المجهود

يعشم ظماي ببارقٍ بالكذب يغريه

ويمطر على وجه الثرى حلمي الموؤود

انا كيف ابامن وقتي اللي كشف خافيه

على سكةٍ فيها الرجا والعشم مفقود

تجود بيمينٍ خيرها ينخدع راعيه

وتاخذ بثنتينٍ وراها العذاب يزود

زرعت النقا في قاعها واثمرت سافيه

وخابت رجاوي خافقٍ حظه المقرود

مرّتني الذكريات البارحه في عجل

وأشعلت جمر الحنين وطارت هبايبه

ناديت ضحكة زمانٍ ما بقا له طلل

وأشوف وجه السنين من الجفا شايبه

يا وقتنا اللي سرق عمر الهوى وارتحل

وشلون روض الغلا جفّت به سحايبه

وقفت بين الرجا والياس مالي أمل

والشوق تدمي على مرّ البطا طلايبه

ما عاد في شرهة الخافق عتب أو زعل

وطيور الأحلام في كفّ السما خايبه

عطيت من لحم الوفا لين انكشف عظم الإحساس

واثر الحصاد اللي جنيته من تعب عمري هدر

فصّلت من خام النوايا البيض للعالم لباس

وكسيتهم لكن لقيت الحظ من دوني حدر

ظنيتني غالي واساوي في عيون الوقت ألماس

وأثري مجرد دمعةٍ طاحت على صم المدر

أكسّر أحجار التمني في يدي من دون فاس

واسقي تراب المستحيل اللي كسا قلبي كدر

أزفر عنا صدري وتخنق كتمة الآه الأنفاس

وأمشي على شوك الجفا لو ما درى عني القدر

يا وقت كبدي من عجاجك معلّه

والحمل جاير وارتخى عصب الحيل

يا كم رفيقٍ لاذ قلبي بظلّه

وأقفى وخلاني بدرب المجاهيل

أشرب مرار الوقت من كل دلّه

وأروي عروق الصبر دمعٍ كما السيل

يا صدر كم ضميت جرحٍ وغلّه

من قسوة الأيام والشيل والميل

دنيا تدور وكل شهمٍ تذلّه

ترفع مقام اللاش فوق الرجاجيل

الشيب لاح والوقت سيفه يسلّه

يقطع معاليقي ويطفي القناديل

مات بوحي والقصايد ودعني

وانطفا في تالي الخاطر سراجي

خاب مسعاي القديم وخاب ظني

واستوى طعم الحلاوه والهماجي

دامني جربت وش فاد التمني

طاحت احلامي على شوك السياجي

يا طواريق الشقا لا تطرقني

ما بقى للبوح في صدري رواجي

المعاني في ضلوعي يرتجني

مثل سيلٍ ضاق في بطن الشراجي

كل ما جريت ونه تمتحني

تاهت الخطوه بعتمات الدياجي

يركض بي العمر المعنى على الحول

والحلم يصغر لين عانق ترابه

أوقف وأطالع خطوة الياس بذهول

وأشرب ظما الأيام وأرجي سحابه

الموج عالي والسفن دونها وصول

والحظ غارق في غياهب عبابه

أغصان عمري تشتكي قسوة ذبول

والضيق يعزف في ضلوعي ربابه

ما عاد بالدنيا مسرات وحلول

وأحلام روحي غلفتها كآبه

عزيت نفسي والأمل صار مشلول

والعمر ضيع في المتاهة حسابه

كل ما قلنا فرج طاح من غيمه جمر

والسنين العوج تقسى على أيتامها

وش خذينا من زمان التعب طول الدهر

غير طعنات ٍ توالت على عظامها

نرقب شعاع الأمل في تباشير الفجر

والظروف السود تبني علينا خيامها

كم شربنا من ظما الوقت كاسات الكدر

والليالي القشر ترسل علينا سهامها

كم خفينا العبرة اللي توقد بالصدر

شيمة ٍ تكبح جموح الأسى بلجامها

كم عطينا ما نطرنا من الجاحد شكر

مير هقوات الزمن حطمت أصنامها

والله إن الآدمي كنه بوسط القبر

لا طوته الغربة اللي طغى ظلامها

يا دنيةٍ فيها ضباب وتغويش

تبخس مقام الطيب وتبيعه بلاش

يا هاجسي بالصدر ضيقة وتشويش

من عالمٍ تلبس لنا ثوب غشاش

بعض العرب مثل الطيور الخفافيش

تخفي سواد قلوبها بوجه بشاش

ياما سقيناهم كفوفٍ معاطيش

واليوم شحوا والوفا بينهم طاش

وقت الرخا تلقى الجموع المداغيش

وان كشرت بانيابها عودوا لاش

يبنون من وهم السراب الف تعريش

تسفي عليه الريح ويصير قشاش

عزيت نفسي عن دروب الدراويش

اللي غلاهم ينجلي كنه رشاش

كل يوم الهم يشرع باب غابه

والأماني تنطوي طي المتون

وش جنينا من متاهات الإجابه

غير حلمٍ مات في ظلم السجون

كم بذرنا الحلم في صم الصلابه

واثر دورات الليالي ما تصون

تاه ممشى العمر وشحيحٍ زهابه

في فيافي يأسنا نرعى الجنون

كل ما قلنا برينا من صوابه

ردنا كف المقادير لغبون

شابت الهقوات في وجه الطلابه

واستماتت في حناجرنا الشجون

السنين العوج ما فيها رحابه

والخلايق تحت صكات الديون

لوعتي غنت على حزن الربابه

والرجا يصغر على حد السنون

بين الرجا والوهم تاهت مكاتيبي

والوقت يكشف قسى ساطي مخاليبه

تعطي بكف الرضا وتزيد ترغيبي

تاخذ بكفينها أغلى مكاسيبه

أبني قصور الأمل وتخيب تصويبي

والحلم يقفي ولا ترحم عواقيبه

أضحك وأخفي عن العالم عنا تغريبي

والصدر زادت من الحسرة مصاعيبه

دارت رحى وقتنا واستعجلت شيبي

جابت لي الجرح لي تصعب أطابيبه

نعطي من الروح لو زادت مصاويبي

نحصد جفا الوقت لو طالت ألاعيبه

ضاع الأمل في دروبي واختفى ترحيبي

والحر يصبر على قسوة مجاديبه

أمشي مع الناس ما بينت عذاريبي

والقلب يشكي من اللوعة مناسيبه

بذرت الصدق في قاعٍ توالت فوقها الأسراب

أشوف الوهم في عيني يكذّب ما درى عنّي

عطيت الناس من روحي ظننت ان الوجيه أحباب

وأثاري ريحهم هبّت وخيّب بالهوى ظنّي

قريت وجيه من حولي وعفت اللوم والغيّاب

لقيت ان الوفا وهمٍ وبعض العيب جا منّي

طويت السّر في صدري وقفّلت العتب والباب

سريت بليل هالعزلة ولو درب الشقا مْعَنّي

تخون الخيل فارسها ويغدر سيف بالأرقاب

وخاب اللي هقيته درع بادرني ويطعنّي

سكنت الصمت في دنيا ملاها الزيف والأغراب

وشفت اللي عطيته من بياض القلب متجنّي

يقولون الثقة مكسب وأقول ان الثقة سرداب

نهايتها ندم باكر ولوعة ليل تغبنّي

عزفت البعد عنهم واكتفيت بوحدتي مرتاب

وكبر الجرح في قلبي يعنّ الروح ويعنّي

سقيت البيد من نزفي ولا أنطر ندى وسحاب

ولاني مرتجي مزنٍ يلوح وكاذبٍ يمنّي

كتمت الآه والهمّ الوجيعي

ووقتٍ ما خجل من سوء صنيعه

تجرّعت العنا كاسٍ نقيعي

وذقت من القهر غدر وْخديعه

نخيت الصبر والخطب الشنيعي

لقيت إنّ الوفا يجزى بْقطيعه

بذلت الطّيب والقلب الرّفيعي

وطاحت في حشا روحي وقيعه

سراب أحلامنا فجأه يضيعي

على قسوة مقاديرٍ مريعه

أدوّر من لِصَوْتِي يَسْتَمِيعِي

ونا نفسي من الطعنه صريعه

وقفت بْوجه الأيّام الشجيعي

ولكنّ السهام لْفت سريعه

أكابر والألم سيفٍ قطيعي

ونار الحزن في جوفي وليعه

أداري دمعة الطّرف الدّميعي

وروحي في متاهاتٍ مضيعه

زلّت أقدام الاماني في متاهات الهيام

واثر بيضان النوايا تورد حياض الخطر

غرّني برق البداية وابتسامات الغمام

واحسب إن الروح تروى من هماليل المطر

بان مستور الخفايا وانجلى ريب العسام

والحقيقة وقّفت لي مثل سيفٍ في نحر

أشهد إن الجرح لاقى في خفوقي له مقام

ساق ركبان التجافي في مسافات السفر

النوايا اللي هديتك ليتني عنها صيام

كيف تجزاني بجرحٍ ما يطيقونه بشر

ما بنيت أحلام عمري تنتهي كومة ركام

واثر طوفان الحسايف هدّ سورٍ من حجر

الملامه ما تداوي جرح مسموم السهام

والندم ما رجّع اللي طاح من راس الوعر

كل ما صديت عن ذيك المساكن

ردني عصف الطواري للصبابه

طيفهم في وحشة الايام راكن

والضلوع العوج من فقده خرابه

والطواري في معاليقي تراكن

مثل سيلٍ حدرت عالي سحابه

في فياض الصدر ذيبٍ بات ساكن

يشتكي لليل من جور الذيابه

والله ان الجرح فيني صار ماكن

لو سترت الوجد في سودة ثيابه

قلت ابسلى واطوي الذكرى ولكن

عانقت روحي طواريق الكآبه

كل ما غطى سما عمري دواكن

هل دمع العين من فرقا صحابه

ابني لغيري من عروقي ترانيم

وانا تشردني عواصيف خذلان

اطفي حرايقهم وصدري هو الجحيم

يضحك رمادي كل ما ثار بركان

ياما عطيت النور في ليلٍ بهيم

والضيق كسّر في حشا روحي جدران

امسح دموع الناس واضحك للنديم

وانا بصدري ينزف الفين شريان

اضحك واسلّم للمقادير تسليم

والعمر يركض بي على خيل خسران

كنّي خلقت لكسرة الروح تصميم

وانا غريقٍ يلفظ انفاس غرقان

ابني صروح العز من بعد تحطيم

واسند كتوفٍ ما لها ريش جنحان

سقت العطا من طيب ذات وهقاوي

واثري سقيت القاع والزرع عطشان

ياما كتمت الآه تحت المكاوي

وأجني من كفوف المواليف حرمان

الجوع شين وراعي الجود طاوي

أعطي ولا دوّرت شكرٍ وعرفان

صوت الوفا في داخل الروح داوي

واليوم صكّت دون الاحلام بيبان

كم لي أعاتب خافقٍ حيل غاوي

يحسب جميع الناس للطيب عنوان

خضت الغزر واليم ماني بناوي

إلا بياض الوجه في كل ميدان

أرخصت روحي فاللوازم فداوي

واثر العطا لا زاد يُجزى بنكران

عوّدت ما كفي من الغُنم حاوي

إلا بخفّي حْنين والقلب خسران

نسجت من خيط الأماني قلايد

وأثر الوعود الكاذبة حلم موؤود

كم ليلةٍ عانقت فيها الوسايد

وأدفي كفوف الحلم والوصل مفقود

طاح العشم والروح صارت همايد

من خيبةٍ تدمي ولا جابت شهود

حتى العتب ما عاد يطفي الوقايد

دام المشاعر صابها ثلج وبرود

زرعت حلمي في رجاوي الحصايد

وأثر السنابل ما عطت أي مردود

واليوم صرنا للظروف الطرايد

مثل الورق لا طاح في درب مسدود

ماتت على شط اليقين العقايد

وأصبح غلانا من قسى الوقت مهدود

بانت مواريث الأسى والفقايد

عقب الأمل يوم اندفن داخل لحود

سلمتك الخفاق وامسيت مخدوع

واثر الوفا في دنيتك كان كذاب

يا ما زرعتك أمن في داخل ضلوع

واليوم مالي في مساحاتك حساب

طاح العشم والقلب بالحيل مفجوع

من خنجرٍ جاني من ايدين الاحباب

كنت القريب اللي له السمع والطوع

واصبحت جرحٍ ما تداويه الاطباب

حبٍ نبت بالروح ما هو بمزروع

عمرت لك جنة وجازيت بعذاب

عافت عيوني شمسها وقت الطلوع

من طعنتك هديت في قلبي اطناب

ما عاد ينفع دامها بانت طبوع

طاح القناع وبان لي كيد الانياب

أقفيت عنك ولا بقى نية رجوع

طويت قيدك وانقفل ذاك الكتاب

اضحك واجامل واغطي جرحي المكتوم

وامسح دموع الحزانى في رعايه

والجرح ينزف خفا والضلع به مثلوم

واخفي عذابي ولا اطلب له عنايه

ياما دملت الجروح وخاطري مصدوم

كني طبيبٍ عجز يلقى وقايه

اللي شكى من عذاب الوقت والمهموم

اصير في عتمة ايامه هدايه

اصد وجه الزمان الشين ثم اشوم

والجوف ينزف ولا ينطق شكايه

ازرع دروب الفرح في وقتي المسموم

والحزن باسط على صدري ولايه

واصبر على الجرح لو ان العذاب يدوم

ولا احسب دروب الوفا والصدق لي جنايه

امشي على شيمة الاحرار والسلوم

واكتم طعوني ولا اتبع غوايه

يا كثر ما شلت من همٍ يهد عزوم

والروح تظما ولا ذقت السقايه

اكتم جروحي داخل الجوف وادمجت

حزني مع العزله وطيب الشهامه

ياما على درب التناهيد ادلجت

امشي وحيدٍ ما شقاني قتامه

حكت الوجع بين الحنايا وديبجت

ثوب الشموخ اللي يغطي حطامه

شديت سور الصبر حولي وسيّجت

عشب الخفوق اللي ذوى من صيامه

كم من جروحٍ في ضلوعي وعالجت

بالصبر لين الجرح يطوي خيامه

شفت الجفا بعيون ربعي وعرّجت

يم السكوت اللي يخوّف ظلامه

ياما كتمت الهم فيني وتوّجت

راسي بتاج الصبر رغم انقسامه

صديت عن زيف الخلايق ومنهجت

دربٍ طويلٍ ما يبيّن ختامه

شلت الحمول الكايدة يوم درّجت

صوب العلا والوقت قاسي نظامه

يا كاسبٍ روحي من ايدين حرّاس

وشلون حلمي بين الايام مفقود

أهديتك عروق الغلا صدق واحساس

واليوم تجزاني بنكران وصدود

حسّبتك لعمري عن الجرح نوماس

واثرك سهم مسموم بالظهر مرصود

كنت اقرب لنبضي من العين والراس

وأمسيت في ظلمة لياليك مصفود

أشعلت نار الخذل في عود يبّاس

والنار تاكل ما بقى لي من عهود

لج الخفوق وثار بالصدر هوجاس

مثل البحر لا هاج ما يرحم سدود

سامك خفوقي بالغلا دون مقياس

واجزيتني جرحٍ مع الوقت ممدود

جرعتني من كاس خذلانك الياس

واقفيت ما كني على الارض موجود

غاب الكلام وماتت اليوم الانفاس

ودروبنا صارت مسافات ولحود

اثر الغلا كذبة هوانا بلا ساس

كنه سرابٍ بالخلا غير مورود

كانت بدايتنا شعور

يا حيّها ذيك البدايه

نبني من الفرحه قصور

والكون يضحك لي معايه

درب الهوى مفروش نور

والقلب في ستر وعنايه

يا لين صابك هالغرور

صدّقت رمسات الوشايه

جفت على غصني زهور

أهديت لي جرح وشقايه

جف القلم بين السطور

ما عاد تنفعها القرايه

خلّيتني نقطة عبور

وأنا أحسبك للروح غايه

ما عاد لي بالقلب دور

مالي وسط عينك بقايه

قلبي غدا تايه ومكسور

وأشوف جرحي فالمرايه

أكتم صوابي غصب مجبور

أخفي عن العالم بلايه

أكابر في وجيه الناس وأرسم ضحكةٍ وعزوم

وأنا من داخلي دولة تهاوى سورها الوقاف

أداري دمعة الشاكي على نهج العرب وسلوم

ولا أرضى دمعتي تذرف وتفرح شلة الأحلاف

يقولون الجبل راسي ولا هزه هبوب سموم

ولا يدرون عن نارٍ تهاشم يابس الأجواف

أسامر في دجى ليلي كواكب عانقت لغيوم

وأخيط الجرح في جوفي وأجامل والزمن طوّاف

ليا مني ضحكت يبان في وجهي شقا ورسوم

أخبّيها ورا هيبة شموخٍ يكره الإسفاف

كما حرٍ كفخ عالي وفي جو السما بيحوم

كسر جنحه مهب الريح وعاف المرقب الكشاف

أواجه قسوة الأيام وأضحك في نحر لخصوم

ولا أقبل في دروب العز غير القمة المشراف

أطيح ليا غشاني الليل وأرثي حيلي المهدوم

تهاوى برج صبري وانتهى حلمٍ على الميقاف

أنا ياصاحبي في شرهة الوقت الردي ملزوم

أصارع موجه العاتي وأدوّر للنجاة ضفاف

تعايشت الوهم حتى حسبت إن الشقا موهوم

وأثاري طعنة الأيام توجع قاسي الأعطاف

تجرعت المرارة في زمانٍ يظلم المحروم

ولا بيّنت للشمّات جرحٍ يذرف الرعاف

كم زرعت الطيب والنيّه نظيفه

واثر زرعي في سرابٍ ما يودّي

ما رجعت إلا بخيباتٍ عنيفه

منوةٍ طارت على راحة يدّي

طاح دمع الوجد في لحظة نزيفه

واستباح الحزن مسرى فوق خدّي

كل ما لاح الأمل وأرخى بطيفه

ضاع في صحرا الجفا والبعد كدّي

والوليف اللي هقيته لي خليفه

يحسب إني غيمةٍ لجله تندّي

كم تحمّلت الطعون اللي كثيفه

لجل عين اللي كسر بالهجر ودّي

ليتني ما كنت للهقوه حليفه

يوم بان الغدر من لي كان ندّي

عشت أرقّا كل قمه لو منيفه

ما نزلت لقاع من عاش التردّي

جيت له روضة غلا خضرا وريفه

وانثنيت بخفّ حرمانٍ وصدّي

في النهايه تنطوي بيضا صحيفه

عقب ما جفّ الوفا من حوض عِدّي

عن دروب اللاش رجليني خفيفه

والمقفي من رحل ما يوم ألدّي