شعر سعودي نبطي أصيل

ما بقالي قـلب يشفع لك خطيّه

ذوبـته اجروح صدّك والخطايا

صاحبي بالله ... لا تعـتب عليّه

العَـتـب ما عاد تاسَعه الحنايا

كلّ جرحٍٍ فات لي منك هديّه

وش بلاك اتخاف من ردّ الهدايا

الله أكبر ... كيف مالك مقـدريّه

وكل ما تحمله من هـمّي بقايا

لاتمنّيني سَراب المهمهيّة

القرَاح اليوم ... مايروي ضمايا

ملّيت أمشّي كلامك وين مقصودك ؟

بأوقّفك أبسألك وتقول لي واصل

واصلت دربك ولكن ضاعت حدودك

واللّي حصل لي ما أظنّ لحضرتك حاصل

تعطيني وعود لكنّ تبخل بجودك

بَنِيْت دون الحقيقة حاجز وفاصل

مابي ملامك عتب وأرفض عتب سُودِك

إنته من العين مهما تفعله ناصل

كمّل بروحك .. لنفسك .. نقصك وزودك

تاصل طريقٍ .. تبي أو علّ .. ما تاصل

آه ... من ليل التجافي ... ماطوله

ليلة العاشق ... ثوانيها ليال

من يقول الشمس باكر مقبله

كل شمسٍ مالها ... وجهك ظلال

بسالك باللي خذى منك الوله

وحطه اف صدري ... واعطاك الجمال

حاكني ... لجل الليالي ...الآوله

آه انا بموت من ذل ... السؤال

هو صحيح انك حبيبي اللي دله

واستوى ... عندك فراقي ... والوصال

هيه يا غصن تمايل بالدلال

ما تخاف الكسر لا هب الهبوب

وما تخاف الله وتسعى بالعدال

انصف من لحاظ عينيك القلوب

لا متى ذبح العرب عندك حلال

تابت العالم متى عينك تتوب

مير قلبي يا لغضي بيعه محال

ما أقدر أعطي لو تبي مني ذنوب

أشهد إنك بالحلى فقت الخيال

وعيب حسنك كان في حسنك عيوب

شارقة في طلعتك شمس الجمال

وجامع في ضحكتك كل محبوب

انا .. انا .. لولاي انا من تكونين

اقولها وانا نعم .. فيك مغرور

انا جعلتك نور وانتي .. من الطين

جرة قلم .. وامحيك من عالم النور

انتي بدوني وردة في البساتين

والورد في دنيا .. البساتين مغمور

لكن معي صرتي .. كما الشوف للعين

والعين لولا الشوف .. ماظن لهادور

هذا وقصدي تعرفي موقعك زين

وحذرا .. ترى من انذرك صار معذور

اما اشتري ودي على العسر .. واللين

والا تراني .. بايعك بيعة البور

حنت خلوج وقلت كفي عن النوح

يا ناق ما بك ما يعادل خلاجي

يا ناق انا قلبي من الود مجروح

وجرح الموده بين الاضلاع لاجي

على الذي من بدت البيض مملوح

حي بغاراته لقلبي يفاجي

عبث سلب عقلي على غير مصلوح

عكشن رموشه شرعن بالحجاجي

حبه بمكنون الحشا جاحني جوح

حبن شكاه عقاب ولد العواجي

اغليه لو انه خطير على الروح

عيني تبي شوفه وقلبي يراجي

أنا .. أنا وأعوذ بك يارب من كلمة أنا

عبد وهبته من بديعات المواهب ماوهبت

آمنت بك وأسلمت لك أمري وأناوأنا وأنا

المنتهي كل أربعاء والمبتدي في كل سبت

أخاطب عقول الرجال الفاهمه وانا هنا

واليا شاء الله وأمرني ماتحاكيت وكذبت

أجمل نساء الارض غنت لي بصوت الله لنا

وأنا الفقير اللي رزقه الله بمرعى كل نبت

طرقا عرض فستانها الازرق خطر غصن القنا

نازل على الوادي بنا يشرب وانا قبله شربت

حبيتها لين انفرط سلسالها بعد وعنا

وأبعدت عنها في حياتي كثر ماعنها قربت

أنا مقدر أكون .. اني حبيب في بعض أحوال

أنا كلي أجي .. و الا أروح بعزتي .. كلي

تخيرت الفراق و مادريت إن الفراق وصال

أقول انني نسيتك بس مدري كيف تاصل لي

خذاني لك سؤال في عيونك و الجواب محال

خذاني منك دمع في عيوني مارضى ذلي

رحلت انت و تركت بداخلي طيفك و صبر طال

غدت ذكراك شمس ما تغيب و صورتك ظلي

حكيت و مالقيت من الحكي الا الندم موّال

سكت و مت بالحسره و لا ادري و شهو احسن لي

أحبك كل مافيني يحبك يا خلي البال

تخيلتك دواي و صرت جرحي الصعب يا خلّي

الشعر بوح وهاجسي يكره البوح

وشلون يلقى كاره البوح راحه

الطعنه اللي حاولت تاخذ الروح

ماخلت بصدر الشمالي مساحه

ياضيقةٍ صارت معي وين ماروح

بعض الصراحه منك توجع صراحه

لكن حبيبك ماتعود على النوح

ياخفّ جرحك بين باقي جراحه

بعض الجروح نحبها لوهي جروح

يسعد مسا جرحك ويسعد صباحه

مسموح لو توجع خطاياك مسموح

حكم الخطايا منك فيني مباحه

رغم التعب والتناقض منزلك عالي

لو كنت في خطوتك تكثر تعاريجك

عنيد لكن عنادك حيل يحلالي

ولو كان للعند تاج اعلنت تتويجك

لكن ترفق وشوف وجيه عذالي

تفرح،،تأيد صدودك لي وتحجيجك

يكفي تشوف بعيونك ثوبي البالي

اللي تمزق تحت قسوة كرابيجك

حزين رددت للاحزان موالي

وانت اتغني فرح واسمع اهازيجك

لازلت احبك ولكن وعد يالغالي

لابد،،،اوقف دعاباتك وتهريجك

يا مالك أبن الريب .. يا ريب مالك

لا تعترف لاحدٍ .. ولا يعترف لك

صمتك ضجيج .. وضجتك صمت حالك

صاح السكون أبمن تكون وهتف لك

من بعت شمسك واشتريت بضلالك

في صفحة الماء نجمةٍ ترتجف لك

هذا أنت .! في قاع المدينة لحالك

مالك بها ممشى ولا ينو قف .. لك

ما دو زنت وقع الخطاوي نعالك

ولا مدى هذا الغموض أنكشف لك

والظبية اللي في مفالي خيالك

دارت وحارت دمعتك تنذرف لك

كل الشوارع تمرّك يالحرير الحر

يا تل قلبي على لاماك من تالي

صحّيت جمرة .. و ذاب الشمع و السكّر

وشلون ما اتذكّرَك و تمر في بالي

في بسمتك يضحك الرّمان للمرمر

و بعد يغار الشهد من ريقها الحالي

و يحق لك يا صغير السّن تتكبّر

إلاّ على اللي يحبّك يا بعد حالي

يا كثر حبك بقلبي و الغرام أكثر

و تخيّل وش كثر أحبك و انت غربالي

يا خلطة المسك و الرّيحان و العنبر

الريح تستاذنك يالطّيب الغالي

رح وين ما تشتهي رح قد ما تقدر

أنا أول الناس في قلبك و انا التالي

توديع الاحباب مثل الموت له سكره

ادمي جروحي وشق الصدر منيّا

والقلب طيرن ضلوع الادمي وكره

لاشاقه الطلع لاسلم ولا حيّا

مصير الاحزان تنساني وتفتكره

ماكل الايام بيض وسمحت محيّا

قل غيرها منت لامجبر ولا مكره

لاصار ماهو غلا مابيلك احميّا

لوفي يدي شي ماقلت الوعد بكره

حزمت حدب الضلوع وقلتلك هيّا

لوكل غالي تجي دايم علي ذكره

ماصرت اشوفك هناك وحبك هنيّا

ياليتني لابغيت اكره قدرت اكره

ماكان قلبي اللياجيت اكرهك عيّا

هنا نجلس أحسن أو هنا؟ وين ماتبغين

أنا احب هذا الركن لكن على أية حال

هنا أحسن ،، أرمي معطف الفرو ، للتخمين

وفيه تعرفين إننا احب هذا الشال

علامك ، علامك ساكته ،، ليه ماتحكين

تبين أبتدي؟ حاضر ، على امرك براحة بال

على نفس هذي الطاولة ، من ثلاث سنين

رمت بنت دبلتها الذهب ، وانكسر رجال

تمسك بها حاول وحاول ، لين بلا لين

كان يحاول بكفّت الأشكال

وشدّت ايديها ، وارتفع صوتها وبعدين ؟

أنا لازم امشي ، وأنت يكفيك لعب عيال

على حر من قلب انهدم حاول المسكين

وعلى قل من مهل الندم ، باعدت تختال

هنا ، مات حب و، يبس قلب و ، تملت عين

من الملح ، وأندفنت حكاية فرح وآمال