شعر بحريني باللهجة البحرينية الأصيلة

ليا صار الخريف أقرب لموسم بردك الحيران

أريد أفهم لمن ينظر حنينك يوم تلقاني

لمن تشتاق وتعاند وتعطيه الوهم عنوان

إذا كان الأمل كذبه تغطّى خوفك الجاني

أحبك لكن إسمح لي أريد أعرف من الغلطان

بداية عينك النار أو نهاية قلبي الفاني ؟

بداية في صورة تصوّر فوهة البركان

نهاية من رسم خيبة رمادٍ فوق بركاني

تِرَدَّدْ كلمة الحب وتخاف تسمَّع الحرمان

تخاف الطين يستسلم ضماه بوجه حرماني

يذوب الطين ؟ من حقه ومن حقك تصير إنسان

ومن حقك تموت بحب وتحيا بحب وتعاني

أحبك فوق هذا الحب كله

أحبك غير كل الناس والله

دخيل الله ناظر كيف عيني

تلم الشوق واجفوني تفله

عشانك بفتح القلب وتأكد

من اللي غير حبك يستحله

ومن أقصاي لين أدناي شفني

أنا كلي على بعضي أدلة

إذا قربت بالخطوات صوبي

يفز كل عضو فيني من محله

كأني من مزونك أرض تزهر

وحبك يروي القلب ويبله

اسرحك من حلم الافكار والقاك

ياتوق طيش يقبض اليأس ماتاب

هوجست بك ياطول صبري بلياك

قسم لاموت وخاطري منك ماطاب

ياارق من الدنيا بحلاتك ومبداك

احبك احثر من هوى كل الاحباب

حبيتك بعقلي ولاشي لولاك

ويافاتني حبيتك بقلبي وذاب

لك في مدار القلب افانين الافلاك

ياذوق يلعن غربتي فيك الاعجاب

ارتاح لك واشتاق لك واتمناك

شوق مثل حلم المسافر للاياب

وش حدني للشعر يا كود شوقي

ووش حدني للشوق لولا محبتْك

ووش حدني للحب لولاك ذوقي

وما حد ذوقي غير علمي بطيبتك

حبك تغلغل واستبد فعروقي

سريت فيها لين ف القلب صبَّتك

وان كان به غيرك سكن في خفوقي؟

فما غيرها امّك يومها ليّ جابتْك

وتغِير ؟ هذا وإنت طيّحت سوقي !

اللي يجي لي؟ يشتري منْك هيبَتْك

وماشفت وش كثر الفراشات فوقي؟

حتى محَد يلمح جناين .. حبيبَتْك

جنون الوقت يا خلي سرق من إيدنا لحظات

فقدناها ...ظلمناها ... بعد أيام وردية

يكيف اصبحت عن ناظر عيوني كالرماد اشتات

خذتك ارياح دنيا للأسف باجواء شتوية

بعيده صرت وحدي في دجى الليل ومع الظلمات

تواسيني رسايل لهفتك واضحك بعفوية

غريبة كيف صرت اليوم مشغولٍ بكل اوقات

تعودت الوصل منك ولو صوتك يجي ضيه

بدونك ..آآه .. من دونك حياتي تفقد النبضات

صعيب الحال صدقني .. غدت هالحال مرثية

حبيبي لمّ تقراها حروفي حبرها دمعات

أبي تحضن بها اشواقك وتنثرها بايديه

سمي على قلبي قبل تذبحينه

سمي عليه وقولي انك تحبيه

شيحي بوجهك قبل ما تطعنينه

اخاف يحيى لا درى انك ذبحتيه

من كثر ما هالقلب عندك رهينه

بديت احس انك بجوفك حملتيه

كلما سمعته يشتكي من انينه

اردد اسمك يمكن اسمك يعزيه

مرة سأل عنك اذا تجرحينه؟

كذبت وقلت انك ابد ما جرحتيه

ومرة سأل عنك اذا تذكرينه

كذبت وقلت انك ابد ما نسيتيه

تو ما طاب الشعر ياهاجسي لاتسري

دربي الليلة طويل وفكرتي مجنونه

الله أكبر لانتشى وسط الليالي شعري

هُونه الدرب البعيد المدلهم ياهونه

السوالف مغريه وقلبٍ سباها يغري

والحنايا تشتكي مشاعرٍ مسجونه

تطري الذكرى علي وليتها ماتطري

خوفي تبعثر خفايا ساكنه مركونه

ان تبدّت هيّجت مد المحيط الفكري

وان توارت عن عيوني خان شعري لونه

إيه يا وجدٍ يغيب ويرتمي في صدري

أخلف المقفي وَعَده وطاوعته ظنونه؟

يا رفيق الجرح الأول .. جرحك التالي بيا

مدمي ٍ باقي عروق ٍ باديات الإحتضار

ما ذبحنا غير قولة : ( كبريانا ) .. كبريا

من عرفنا كبريانا كل شي ٍ فانحدار

لا تحَسْبَ الشمع نوره يكفي العالم ضيا

كل ليل ٍ بالخطايا تكشفه شمس النهار

الحقيقة في وضوحي ... لا غرور و لا ريا

البلا إن الخطا شيَّد على عينك جدار

كان صِغر السن ظنّك في عذاريبي حيا

كيف ظنّيتك تخلي للعقل أدنى اعتبار

يا بدايات الهموم و يا بداياتي و يا...

.. آخر أحزاني ويا أكبر أحاسيسي الصغار

يا بوي من شفتك بهالموقف اليوم

حسّيت طعم الحنظل بغيبة الأم

ذا هم يفرق حيل عن كل الهموم

هم المفارق هم ما يشبهه هم

لو تبكي عيونك فلا يلحقك لوم

معذور لو تبكي عيونك لها ( دم )

أمك تراها اللي جفت لجلك النوم

من قبل تطلبها الطلب تصرخ بْتم

ما عمرنا شفنا بها طبع مذموم

سنين يروينا نبع طيبها الجم

للأم غيبه طعمها مرّ مسموم

تنسم من طعمه وانا منْه منسم

ياحياتي في عيوني شوفي جروح الزمان

لاتغرّك ضحكة ٍ مابين عيني راسية

يوم جيتي في ثواني وابتعدتي في ثوان

ماتركتي غير ونة في جروح ٍ مدمية

ويوم رديتي عيونك تلمحي قلبي يهان

ماشفع لي موق عيني يذرف الدمعة مية

تحسبين دعيج قلبه في وعود الحب خان

وتحسبين الحب عنده بس مجرد تسمية

لاحشى والله يشهد واسألي شهود العيان

عمري وفكري وشعري دوم لجلك مصغية

وش جرى يابنت قولي لايضيع الاتزان

كلما قدمت خطوة تبعديها مقفية

ماجور يا قلبٍ غدى به زمانه

ما بين ناسٍ ما تعرف المواجيب

ياما وفا بالود وابدى حنانه

وياما تبدى للخبيثين بالطيب

وياما صلح ما بينهم بالرزانه

ليمن نطق قولٍ فلا فيه تكذيب

خل الردي لازم يشوف المهانه

بيجيه يوم ايشوف فيه التعاجيب

هذا جزا من سار درب الخيانه

لابد به يوم يرى فيه تعذيب

صعب على الخاين يصون الامانه

ويوفي بوعدٍ وثقوه المعازيب

احبك أيه احبك هذا حظي اللي ان كتب

ودربي اللي امشيه وادري به تعب

ايه احبك وانتي في عيوني سهر

وانتي وسط القلب حرات وقهر

بس احبك هذا حظي اللي انكتب

اشوف الناس بعيوني ومن بدهم اشوفك غير

واحس مثلك بها الدنيا ابد مايصير

في عينك سحر ياخذني ويخليني معاك أسير

احس عمري وقف عندك وايامي وراك تسير

احبك ايه هذا حظي اللي ان كتب

يادمعة عيني في فرحي ودمعة عيني في احزاني

ياحب تالي العمر اهلاً نطرت اسنين لي ياني

باشيلك في وسط عيني يااغلا حب لاقاني

وفي قلبي يافرح قلبي وشبابي اللي رجع ثاني

دامك طلبت الشعر حاضر ولا هنت

بعطيك من شعري جزيلات الابيات

باعلمك شيٍ فِ قلبي ولا قلت

في خاطري مير الحيا بيّ عادات

ان كان ظنك في غيابك انا تهت

آبشرك دليت درب المتاهات

وان كان ظنك اعشقك مثلما كنت

حبك دفنته يوم وسط الحشا مات

ما عدت انا خبرك لعلمك انا عفت

حتي قصيدي لا طرا منك آهات

تعرف طباعي لا بعيني ترا شنت

امحال ترجع في عيوني كما فات

يعني الحكاية انتهت مثلما شفت

ما عاد له داعي تقول البدايات

كان الهوى كذبة وانا بعدها تبت

يالعنبو حبٍ تجي منه دمعات

وش باقي عندك سيد الجرح هاته

وش كن ليلك للمجاريح وش جاب؟

غيري تهنى بعيشته في حياته

وأناحياتي شفتها من ورا الباب

مرت سريعه ما أخطأت بالتفاته

مرت وبيني وبينها ستر وحجاب

ياويل قلبي ركب الأيام فاته

كل تغير بس ذا القلب ماتاب

إنسان طيب مثل عيشه مماته

ومثل الندى روحه على ورد جذاب

يصحى بلحظة لاصحت ذكرياته

لحظة حياته كلها بوقت كذاب

مليون إيه وسجنها في شفاته

ومليون لاإن قالها صار في غياب

ذات عظيمه تحتضر وسط ذاته

توسدت كف الحزن بين الاغراب

ياما جرحوا حلمه وهانوا اعبراته

ياما سقوه من الألم دون ما أسباب