شعر إماراتي باللهجة الإماراتية الأصيلة

حب الوطن ما هو مجرد حكايه

أو كلمة تنقال في أعذب أسلوب

حب الوطن إخلاص .. مبدأ وغايه

تبصر به عيون وتنبض به قلوب

حب الوطن .. احساس يملا حشايه

وانا بدونه في الأمم غير محسوب

موجود في دمي وكامل عضايه

سامي وهو للنفس غالي ومرغوب

لك يا وطنا في سما المجد رايه

واسمك عليها باحرف العز مكتوب

الله يا زين الزعل في محيّاك

من شاف زينك ما تمناك ترضين

كلّك حلى لكن زعل وجهك أحلاك

ما احلاك من بعد الزعل يوم تهدين

ما شفت غيرك يشبهك في مزاياك

و ما شفت مثلي حايرٍ بين حالين

حتى ظلالك خايفٍ ما اتعدّاك

كنّه تهوّب خطوتك يوم تمشين

ما ظن تقدر كلمتك تلمس شفاك

وانفاس صدرك تلهبك يوم تحكين

ما كن قلب أنثى حملتيه باحشاك

يا رحمة الله بالبشر يوم تقسين

يا طول صبري من الهجران يا خلّي

والرّوح منّي ومن همٍّ يكابدها

انت الهوى .. وكلّ الكلّ بالكلّي

وانت الذي بالهوى روحي تعذّبها

ياخلّ غيرك على الدّنيا أنا من لي؟

يا كيف دايم تصدّيني متاعبها

مضمون حبّك على الخفرات متعلّي

يا من وحوش الخلا تاخذ مقاودها

ارحم صويب براه الشّوق معتلّي

وجروح راعي الهوى أعيت طبايبها

دعواي دعواك دعوىَ مالها حلّي

لى طلبة لو بعد مرّه تنفّذها

لا تزيد المواجع خلني قد نسيت

لا تقلب بقلبي صفحة الذكريات

انتهى الحب وانته من حياتي انتهيت

كل منا تخير له طريق الحياة

ما أريد أتذكر ماضي به شقيت

منيتي بس أنسى ما تعدى وفات

لا ذكرتك حبيبي من فوادي بكيت

وامطر الدمع الاحمر وجنتي والشفاة

ليتني ما عرفتك ليتني ما هويت

لا رسمتك في عيني أجمل الامنيات

ولا جعلت القصيده تبكي بكل بيت

ولا كتبت المشاعر من فواد وذات

لا لا تلوم اللي طموحه ساكن ف صدر ٍ رحب

لا لا تلومه لو جميع الناس فارقته شبل

صغير لكن عزبته نجمه واقدامه سحب

صغير لكن ما يدوس الا على عالي الجبل

نفسه ملففها بسلاسل ودها فيوم ٍ تحب

تجوع بس تاكل في صحن الدين والكاس النبل

يقول يوم اجذبته العليا ودوّر مصطحب

ما شاف تحته غير صخرة حقد تربطه بحبل

من بين جذب الجاذبيه والسما صار السحب

احيان يفرح كالقمر واحيان يفرح كالخبل

لكن بفضل العالي وكثر الترجي والنحب

قام يتقدم للعلى والحلم دوّرله سبل

لِمِّني في مَحْجَر عْيونك حبيبي وخلّني

خلّني آشوف نفسي في عيونك واطمئن

دامِكإن سَلْهَمْت بالرمش الظليل تْفِلّني

لعنبو ذا الرمش كيف انّي من اسبابه أجِن

حبّك اللِّي تَلّ قلبي من بَعَدْ ما تَلّني

صِدْق أنا ميّت بحبّك كانها عيونك كَفَن

إجْمَعْ اللِّي باقيٍ منّي شتات ودلّني

شوفني ذاك الغريب اللي يدوّر عن وطن

صَدّك اللي هَدّ حيلي والجفا لي علّني

ليه قلبين المحبّه بالمحبّه ماالْتِقَن

قلت ابـ اصبر والصَبِر من زود صبري ملّني

وقلت ابـ انسى واثر طيفك صارله عقلي سجن

ضاعت دْروب المحبّه والحزن ما ضلّني

يا حسافه ذي الليالي.. ذي الليالي ما انصفَنْ

يا بحر أنا بسألك عن مبعد الدار

يا اللي من الأشواق مبرد وخالي

أنت طويت بلجتك علم وأسرار

وانا طرالي من الهوى ما طرالي

عودت لي من ماضي الوقت تذكار

تذكار خل أبعدته الليالي

باسباب ظرفٍ حط في خافقي نار

سوى لهبها داخل القلب صالي

يا ليت يدري ناعس الطرف وش صار

إن كان ما خلاني بجو خالي

لأنه يعرف إني من الناس ما اختار

غيره ولا أبدل سواهم بدالي

ليته نشد عن حالتي وتجيه الأخبار

ويشوف مضنون الحشا كيف حالي

لا تحاول تعيد بدمعتك ما مضى

ما تداوي دموعك جرح طول البعاد

إنتهى الحب يا اللى بيننا وانقضى

ولا بقى لك بقلبي غير ذكرى وداد

كنت أجيك بْخفوقٍ فيه حبّ ورضا

وكنت انته حبيبي غايتي والمراد

وكنت أشوفك حياتي جوّها والفضا

وكنت يومٍ تغيب آموت هَمّ وْ نكاد

بس خِذْها بْصَراحه القضا بالقضا

ذوق كاسٍ شربته منْك اسمه عناد

يرفض القلب مثلك به ودادٍ حظى

دامه انسان مثلك قطعةٍ من جماد

ما تعيش المشاعر في خفوقٍ فضى

كيف تبني ودادٍ له عنادك عماد

أرجوك تنساني وأنا أوعدك بنساك

وانسى بأني في حياتك حبيبه

ما دام غيري عايش الحب وياك

ما أريد أكون بوسط قلبك غريبه

كنت أفتكر فرحي على كف ييمناك

واحلم اعيش العمر منك قريبه

لكن فرقنا القدر يوم لقياك

الله أكبر يالظروف العجيبه

ضحيت في حبك واضحي لفرقاك

والله يصبر قلب ضحى لحبيبه

لا تعيش بي ذكرى ولا أعيش ذكراك

كل بياخذ في حياته نصيبه

قالت : وعقلي ضاع فكره والادراك

يسأل .. ولا يلقى جواب يثيبه

شوقي حمايم والغناوي ربابه

غنت على لحن الربابه حمايم

يا صاحبي بعض النوايا تشابه

والفعل يفرق بين بايع وسايم

يالي حبيبك فيك زايد عذابه

دايم على باله ولو كان نايم

دربك سعاده والمفارق كآبه

مشاعرك ورد وغرامك نسايم

عزمت قلبك للغلا والرحابه

ولو كان ما بين الحبايب عزايم

لو خافقك يفتح لفزاع بابه

لقيت قلبه عن هوى البيض صايم

لو ان احاسيس القلوب اتشابه

سمحت لي كل الذنوب العظايم

القلب لك روض الخضر ما وطى به

إلا غلاك اللي احييه دايم

والله لاخلي السنين الماضيه تعني

و اوادع الناس و ارجع و اخذ المعنى

يمكن حبيبي اذا غنيت يسمعني

قبل البحر يا قلوب الشوق يبلعنا

و اللي خذاني و عيا ما يرجعني

و الدرب مجهول و التفكير ضيعنا

يدفعني الشوق لو اواصله يدفعني

تبادل العشق و هو سبت دوافعنا

تدرون قلبي على هجره ما طاوعني

الناس تعذل و حنا ماتسمعنا

لا قلت احبه تراه الصاحب المعني

و اللي مع الهجر طبعا ً ماهو بـ معنا

لا قال دعني و انا ماقلت له دعني

يالين سالت من الفرقا مدامعنا

حتى في يوم الموادع يوم ودعني

بكت جميع الليالي من موادعنا

ذبحني الشوق من بعدك حبيبي

تعال أحضن عيونك في شقايه

تعال وشوف قلبن بك صويبي

كساه الهم من صدك منايه

أشوف الموت يدنيني قريبي

أنا المجروح وانته لي دوايه

رفض عوقي لغيرك يستجيبي

ولا فاد المهدي في سمايه

طلبتك يا محبي لي تثيبي

رحمك الله وأرحمني كفايه

على طيفك وبظلالك أهيبي

عسى طيفي ينسيكم خطايه

مدام الود شلاله سكيبي

تعال أمطر وزيد الود مايه

أريد أرتاح ساعه من لهيبي

على حضنك وبسماتك معايه

لو عطوني يالغلا وزنك ذهب

ما بفرط فيك وأفرد لشرعه

أنت ماي العين لي تسقي الهدب

وأنت أجمل مالفصول الأربعه

أحمد الله دامك إنته لي سبب

في شقايه لي دلالك يصنعه

الشعر يحلى ولو عقب التعب

يحلى أكثر لو قريته وتسمعه

والله لو أكتب على شانك كتب

ماوفيت القلب دينه وأمنعه

كم نبض بأسمك ودقاته طرب

يندفع صوبك ونبضي يدفعه

لا تلوم إلي ثمل عقب الشرب

حب عذري وانته أصلا منبعه

يا حبيبي خذ عيوني وأزتهب

المهر روحي وبحزم لأمتعه

لا عجب من حب مثلك لا عجب

شخص وافي مالبس مالأقنعه

أحبك زود عمّا الناس حبّت

وحبّي لك يا غناتي عباده

احبك عد مالحجاج لبّت

اوعدّ البحر والرمل وزياده

مع الايام حبّك بي تثبّت

تملكني باراده او لا اراده

شراييني مودّه لك تعبّت

ولك ادّيتها افروض سياده

عقب ما نار حبك زود شبّت

اوقلم شعري نضب منه مداده

نسايمك العليله عطر هبّت

اوحسّيت بمسره وسعاده

سقى الله دار للمحبوب ربّت

مثل ماهو سقاني من وداده

هشيم القلب بالريحان نبّت

اودعاكم لوتكرمتوا لحصاده

يلوموني حبيبي يوم دبّت

محبتك في فوادي يا مراده